Presidenti i Shteteve të Bashkuara, Joe Biden, ka miratuar furnizimin e Ukrainës me mina kundër këmbësorisë, tha një zyrtar amerikan për Reuters. Ky shihet si një hap që mund ta ndihmojë Ukrainën të ndalë përparimin e forcave ruse në lindje të vendit, vecanërisht nëse minat përdoren bashkë me municionet e tjera nga Shtetet e Bashkuara. Shtetet e Bashkuara presin që Ukraina t’i përdorë minat në tokën e vet, edhe pse ka kërkuar që ato të mos përdoren në pjesët e banuara me civilë, tha zyrtari. Ëashington Post raportoi i pari për vendimin e Bidenit. Shtetet e Bashkuara e kanë furnizuar Ukrainën me mina antitank gjatë gjithë luftës së saj me Rusinë, por shtimi i minave kundër këmbësorisë ka për qëllim frenimin e përparimit të këmbësorisë ruse, theksoi zyrtari, i cili foli në kushte anonimiteti. Minat amerikane dallojnë nga ato të Rusisë, sepse këto të fundit janë të “paqëndrueshme” dhe bëhen të padobishme pas një kohe, tha zyrtari. Atyre u nevojitet një bateri për të shpërthyer dhe nuk mund ta bëjnë këtë pasi të ketë mbaruar bateria. Të martën, Ukraina i përdori raketat amerikane me rreze të gjatë, ATACMS, për të kryer sulme në tokën ruse, duke e shfrytëzuar lejen që administrata në largim e presidentit amerikan, Joe Biden, ia dha në ditën e 1.000-të të luftës. Moska tha se përdorimi i ATACMS-ve, raketat më rrezen më të gjatë që Uashingtoni e ka furnizuar deri tani Ukrainën, është shenjë e qartë se Perëndimi dëshiron të përshkallëzojë konfliktin.