Gjermania ka zgjatur kontrollet e përkohshme kufitare edhe për gjashtë muaj të tjerë dhe ka informuar Bashkimin Evropian për këtë, tha të mërkurën kancelari Olaf Scholz ndërsa përpiqet të tregojë se qeveria e tij po lufton emigracionin e paligjshëm, më pak se dy javë përpara zgjedhjeve. Gjermania riktheu kontrollet kufitare në shtator si pjesë e një qëndrimi më të ashpër ndaj emigracionit dhe krimit ndërkufitar pas një rritjeje të të ardhurve, veçanërisht nga njerëzit që largoheshin nga lufta dhe varfëria në Lindjen e Mesme. Kontrollet shënjestrojnë kryesisht azilkërkuesit që hyjnë nga vendet fqinje të BE-së, të cilët i nënshtrohen rregullave të Dublinit që kërkojnë që kërkesat për azil të përpunohen në vendin e parë të hyrjes në BE. Scholz tha se të dhënat treguan se masat e qeverisë së tij po funksionojnë pasi autoritetet kishin kthyer mbrapsht 47,000 njerëz në kufi, kërkesat për azil kishin rënë me një të tretën në 2024 dhe 1,900 trafikantë ishin arrestuar. Me Alternativën për Gjermaninë, të ekstremit të djathtë, që kundërshton ashpër emigrantët, që renditet lart në sondazhe për sa i takon mbështetjes, dhe emigracionin që është një shqetësim kryesor për votuesit para zgjedhjeve të 23 shkurtit, partitë kryesore në gjermani janë nën presion për të treguar se mund ta adresojnë këtë cështje.