Gjermania do të dyfishojë ndihmën e saj ushtarake për Ukrainën në vitin 2024 dhe ministri i Mbrojtjes, Boris Pistorius konfirmoi jo në mënyrë të drejtpërdrejtë informacionet e mediave. Rritja e planifikuar e ndihmave ushtarake është një "sinjal i fortë për Ukrainën se ne nuk do ta braktisim këtë vend," tha ministri gjerman i Mbrojtjes, në një deklaratë për televizionin gjerman ARD. Pistorius konfirmoi në mënyrë indirekte raportimet e ARD-së dhe të gazetës "Bild am Sonntag”, sipas të cilave mbështetja e Gjermanisë për Ukrainën do të rritet nga katër në tetë miliardë euro në vitin 2024. "Ne nuk duam të jemi në një situatë vitin e ardhshëm, ku duhet të kërkojmë më shumë para, kur dihet se kjo ka vërtet rëndësi,” tha Pistorius. Kjo është arsyeja pse rritja është një "sinjal i rëndësishëm" - "sidomos tani, kur Ukraina duhet të vazhdojë luftën e saj, ndërkohë që një pjesë e vëmendjes publike të botës është drejtuar më shumë drejt Izraelit."