Asnjëherë më parë Gjermania nuk ka pasur kaq shumë banorë. Popullsia në viitin 2022 është rritur me 1,3 %, dhe kjo sipas Zyrës Federale të Statistikave në vend, është një rritje e ndjeshme. Sipas kësaj Zyre, në fund të vitit 2022 në Gjermani jetonin 84,4 milionë banorë. Të dhënat sidoqoftë tregojnë se rritja e popullsisë në Gjermani, lidhet qartazi me shtimin e migracionit. Në vitin 2022 erdhën në Gjermani rreth 1,5 milionë banorë, katër herë më shumë se në vitin 2021. Një pjesë e madhe e tyre, janë qytetarë nga Ukraina. Në total, në fund të vitit 2022, në Gjermani jetonin rreth 72 milionë gjermanë dhe 12,3 nënshtetas me prejardhje të huaj. 1,34 milionë janë nënshtetasit me origjinë turke dhe ata përbëjnë edhe grupin më të madh të banorëve me prejardhje të huaj. Pas tyre renditen ukrainasit, 1,05 milionë vetë dhe sirianët, 883.000. Për shkak të luftës në Ukrainë është gjashtëfishuar numri i ukrainasve që jetojnë në Gjermani.