Anija gjermane e çminimit “Fulda” është drejtuar për në Mesdhe. Ushtria Gjermane, po përgatitet kështu për të ndihmuar në pastrimin e minave në Ngushticën e Hormuzit, por me kushte. Anija do të integrohet në një njësi të natos për asgjësimin e minave detare dhe do të vendoset në mesdhe për të qenë më afër vendit të aktivitetit, nëse një mision ndërkombëtar do të vendoset në ngushticën e Hormuzit. Që nga fillimi i luftës në Iran, Teherani ka bllokuar ngushticën e rëndësishme për lundrimin tregtar, për të cilën thuhet se është minuar. Si pasojë e kësaj bllokade, çmimet e naftës dhe të gazit të lëngshëm në tregjet botërore janë rritur ndjeshëm. Kancelari gjerman Friedrich Merz ka deklaruar disa herë se Gjermania është e gatshme të kontribuojë në garantimin e një lundrimi të qetë në ngushticë, por vetëm pas përfundimit të luftës me Iranin. Marina Gjermane ka një përvojë të gjerë në pastrimin e minave detare. Që nga përfundimi i Luftës së Dytë Botërore, ajo ka pastruar vazhdimisht municione të vjetra, veçanërisht në Detin Baltik. Flota posedon dhjetë anije detektuese minash, të pajisura me dronë modernë dhe zhytës për gjetjen e minave. Ashtu si çdo mision i armatosur i Bundesëehr‑it jashtë vendit, edhe një mision I mundshëm në Ngushticën e Hormuzit do të ishte i kushtëzuar nga kritere të caktuara që rrjedhin nga kushtetuta gjermane. Së pari, një mision i tillë duhet të jetë i integruar në një "sistem sigurie kolektive”, si Kombet e Bashkuara, NATO apo Bashkimi Evropian. Së dyti, Bundestagu duhet të informohet për misionin jashtë vendit, ta shqyrtojë atë dhe në fund ta miratojë. Derisa Bundestagu ta miratojë një mision, mund të kalojnë ditë ose edhe javë. Për këtë arsye, Marina po merr që tani masa paraprake. Sa e minuar është Ngushtica e Hormuzit mbetet e paqartë. Po aq e paqartë është edhe se kur do të përmbushet kushti thelbësor për një mision të Bundesëehr‑it: një fund i qëndrueshëm i luftës me Iranin. Aktualisht nuk ka shenja për një fund të tillë. Përkundrazi, tensionet rreth Ngushticës së Hormuzit janë përshkallëzuar sërish.