Gjermania do të dërgojë dy luftanije në indo-paqësor në vitin 2024, tha të dielën ministri i mbrojtjes Boris Pistorius, në mesin e tensioneve në rritje mes Kinës dhe Tajvanit si edhe në lidhje me detin e kontestuar të Kinës jugore. Duke folur në konferencën e sigurisë që po mbahet në Singapor, më e rëndësishmja për sigurinë në Azi, Pistorius tha se vendet duhet të luftojnë për mbrojtjen e rendit ndërkombëtar të bazuar në rregulla dhe mbrojtjen e kalimeve të mëdha detare. “Me këtë qëllim, qeveria federale gjermane dërgoi një fregatë në rajonin e indo-paqësorit në 2021 dhe do ta bëjë sërish këtë në 2024-ën, duke dërguar këtë radhë dy asete detare, një fregatë dhe një anije furnizimi”, tha ai. Pistorius shtoi se zhvillimet nuk janë të orientuara kundër asnjë vendi dhe ky ishte një koment që dukshëm i referohej Kinës. “Në të kundërt; ata i dedikohen mbrojtjes së rendit ndërkombëtar të mbështetur në rregulla që ne të gjithë i respektojmë dhe përfitojmë prej tyre, qoftë në Mesdhe, qoftë në Gjirin e Bengalit apo në detin e Kinës së jugut”, tha ai. Duke treguar një prani më të madhe ushtarake në rajon, Gjermania zgjedh kështu të ecë në teh të thikës mes interesave të sigurisë dhe atyre ekonomike pasi Kina është edhe partneri më i madh tregtar i Berlinit.