Dronë të paidentifikuar janë parë mbi vende të ndjeshme të industrisë dhe bazën ajrore të SHBA-së në Ramstein në Gjermani javët e fundit, raportoi të premten revista Spiegel, duke cituar një raport konfidencial nga autoritetet gjermane të sigurisë. Sipas Spiegel, raporti tregonte pamje të dronëve të shumtë, të marra në orët e mbrëmjes së 3 dhe 4 dhjetorit, mbi bazën ajrore. Një burim sigurie i tha Reuters se raporti mbi pamjet e dronëve mbi Ramstein ishte i saktë. Ministria gjermane e mbrojtjes nuk pranoi të komentojë mbi raportin. Shefat e inteligjencës gjermane kanë paralajmëruar se mbështetja e vendit për Ukrainën në luftën e saj kundër Rusisë, e bën atë një objektiv të tentativave të mundshme të sabotazhit, me incidentet e fundit të sigurisë në kazermat ushtarake që ndezin më tej alarmin.