Sipas të dhënave të Agjencisë Federale të Punësimit në muajin janar numri i të papunëve në Gjermani arriti në rreth tre milionë vetë. Rritja e numrit të të papunëve është tipike për muajin e parë të vitit, sepse shumë kontrata për punë sezonale përfundojnë pas festimeve të Vitit të Ri dhe punë që varen nga moti, si p.sh. ndërtimi, pezullohen gjatë dimrit. Megjithatë shifra e vitit 2025 është më e larta që nga janari i vitit 2015. Punëdhënësit fajësojnë zhvillime dhe prirje të ndryshme kundërvajtëse që kanë penguar rritjen ekonomike të gjermanisë. Që nga dhjetori 2024 shkalla e papunësisë është rritur me 0.4% duke arritur në 6.4%. Kjo do të thotë se në janar 2025 numri i të papunëve në Gjermani është 187,000 më i lartë se në janar 2024. Numri i përgjithshëm i të papunëve është 2 milionë e 993 mijë, njoftoi Agjencia Federale e Punësimit. Numri më i lartë i të papunëve i regjistruar për herë të fundit në Gjermani ishte ai i janarit të vitit 2015, me 3 milionë 32 mijë vetë. Sipas ekspertëve, shifrat e tregut të punës janë një sinjal alarmi. "Dobësia ekonomike dhe strukturore e ekonomisë gjermane po godet tregun e punës me të gjithë fuqinë dhe koha nuk pret", thonë ata duke sugjeruar se nevojitet një reduktim i burokracisë, reforma për kostot shtesë të punës dhe cmime më të ulëta të energjisë. Vetëm atëherë, nënvizojnë ekspertët, gjermania do të kthehet në rrugën e rritjes dhe kthesa në tregun e punës do të jetë e suksesshme.