Gjermania bëhet vendi më i zëshëm brenda Bashkimit Europian që kërkon heqjen e vetos nga vendimmarrjet e unionit. Qëndrimi i Berlinit u bë me dije nga Ministri i Jashtëm, Johann Wadephul gjatë një aktiviteti të organizuar nga fondacioni Konrad Adenauer të mërkurën në Berlin. Deklarata e bashkon Gjermaninë me 12 vende të tjera anëtare të Bashkimit Europian që kanë kërkuar reformim të sistemit të vendimmarrjes, duke hequr të drejtën e vetos. Debati lindi për shkak të bllokimit të Hungarisë së Viktor Orban për lëvrimin e një pakete financiare prej 90 miliardë eurosh si ndihmë për Ukrainën. Por, veç Ukrainës heqja e vetos do të prekë edhe çështjet e zgjerimit. Aktualisht, pranimi i vendeve anëtare bëhet vetëm me votë unanime nga 27 anëtarët e bllokut. Mjafton një vend i vetëm për të penguar një shtet kandidat nga anëtarësimi. Wadephul tha se dakordësia e të gjithë vendeve anëtare duhet të jetë synimi në çdo vendimmarrje, por aktualisht vetoja e bën joefikas Bashkimin Europian në çështje të rëndësishme, që lidhen me sigurinë dhe ekonominë e unionit. ‘Një shumicë e cilësuar për vendimarrjen është e mjaftueshme”, tha kryediplomati gjerman.