Gjermania mund të rikthejë rekrutimin për të gjithë 18-vjeçarët mes frikës për një luftë të plotë të NATO-s me Rusinë. Planifikuesit ushtarakë po diskutojnë tre plane të mundshme, dy prej të cilave përfshijnë një vit shërbim të detyrueshëm ushtarak për të gjithë djemtë pasi të mbushin 18 vjeç. Mësohet se zyrtarët janë në fazën përfundimtare të diskutimeve me ministrin gjerman të mbrojtjes Boris Pistorius që pritet të bëjë publike planet muajin e ardhshëm, raportoi The Sunday Telegraph. Pistorius, gjatë një udhëtimi në Uashington javën e kaluar, tha se ishte 'i bindur' se Gjermania 'ka nevojë për një formë të rekrutimit ushtarak'. Ai gjithashtu e përshkroi më parë vendimin e vendit për të pezulluar shërbimin e detyrueshëm ushtarak në 2011, si një 'gabim'. Në një propozim që po shqyrtohet nga planifikuesit ushtarakë në Berlin, të gjithë burrat dhe gratë do t'i nënshtroheshin rekrutimit sapo të mbushnin 18 vjeç. Politika e mëparshme e Gjermanisë për shërbimin e detyrueshëm ushtarak zbatohej vetëm për burrat. Për të përfshirë gratë do të kërkohej një ndryshim në kushtetutën e vendit, por burime nga ministria duket se besojnë se ndryshimi do të mbështetet nga publiku. Një propozim tjetër, i cili po konsiderohet nga ministria e mbrojtjes si një 'sinjal i fortë' si për aleatët ashtu edhe për rivalët, do të zbatohej vetëm për meshkujt mbi 18-vjeç, por jo të gjithë do të rekrutoheshin. Të rinjve do t'u kërkohet të plotësojnë një formular në internet dhe më pas mund të zgjidhen për shërbim. Një opsion i tretë në shqyrtim shmang rekrutimin dhe në vend të kësaj fokusohet në 'optimizimin' e sistemit aktual ushtarak nëpërmjet fushatave më proaktive të rekrutimit.