Gjermania ka marrë avionin e saj të parë luftarak F-35A Lightning II, ndërsa vendi po përshpejton procesin e gjerë të forcimit ushtarak dhe rritjen e shpenzimeve të mbrojtjes, në kuadër të një përpjekjeje më të gjerë të anëtarëve evropianë të NATO-s për të përforcuar forcat e tyre të armatosura. Dorëzimi i kryer të premten është pjesë e përpjekjeve të Gjermanisë për të përmbushur detyrimet e NATO-s lidhur me ndarjen e kapaciteteve bërthamore dhe për të modernizuar ushtrinë e saj pas dekadash me shpenzime relativisht të ulëta për mbrojtjen, shkruajnë mediat e huaja. kompania “Lockheed Martin” ia prezantoi zyrtarisht avionin qeverisë gjermane gjatë një ceremonie në fabrikën e saj të prodhimit në Fort Ëorth, Teksas, ku ishte i pranishëm edhe ministri gjerman i Mbrojtjes, Boris Pistorius. “Ky është fillimi i një epoke të re për Forcën Ajrore Gjermane: avioni i ri luftarak F-35A është avioni luftarak më i avancuar në botë”, tha Pistorius në një deklaratë. Sipas tij, “ai dallohet për aftësitë e tij ‘ të shmangies ndaj radarëve, integrimin e ngushtë me platforma të tjera dhe teknologjinë e fuqishme të sensorëve. Gjermania porositi 35 aeroplanë F-35A në vitin 2022, vitin kur Rusia nisi pushtimin e Ukrainës. Këta aeroplanë synojnë të zëvendësojnë flotën e vjetëruar gjermane të avionëve “Tornado”. vendet evropiane, përfshirë Gjermaninë, po rrisin buxhetet ushtarake, duke iu përgjigjur kërkesës së Trumpit për të përmbushur pesë për qind të PBB-së për shpenzime që lidhen me sigurinë deri në vitin 2035.