Kancelari gjerman Olaf Scholz dhe presidenti francez Emannuel Macron janë të përgatitur të punojnë me grupet rebele siriane që rrëzuan presidentin Bashar al-Assad me kushte të caktuara, thuhet në një deklaratë të qeverisë gjermane pas një telefonate mes dy liderëve. Udhëheqësit e dy fuqive më të mëdha të Bashkimit Evropian mirëpritën largimin e Asadit, i cili i kishte shkaktuar "vuajtje të tmerrshme popullit sirian dhe dëme të mëdha në vendin e tij". Udhëheqësi sirian u largua nga Damasku për në Moskë të dielën, duke i dhënë fund më shumë se 50 viteve të sundimit brutal nga familja e tij. "Scholz dhe Macron ranë dakord se ata janë të përgatitur të punonjnë së bashku me sundimtarët e rinj mbi bazën e të drejtave themelore të njeriut dhe mbrojtjen e pakicave etnike dhe fetare", thuhet në deklaratën e qeverisë gjermane. Deklarata erdhi ndërsa qeveritë në mbarë botën po përpiqen të krijojnë lidhje të reja me fraksionin kryesor rebel të Sirisë Hayat Tahrir al-Sham (HTS), një grup më parë aleat me Al Kaedën dhe që është cilësuar një organizatë terroriste nga SHBA, Bashkimi Evropian, Turqia dhe OKB.