Gjermania ka dislokuar pesë avionë luftarakë Eurofigher dhe 150 trupa në qytezën polake të Malborkit, për të ndihmuar në mbrojtjen e hapësirës ajrore të Polonisë, thanë Forcat Ajrore gjermane, në një përgjigje ndaj inkursioneve me dronë rusë. Avionët luftarakë polakë F-16, ata holandezë F-35, avionët vëzhgues italianë AËACS dhe aavionë të tjerë të NATO-s u ngritën në ajër në shtator, në një operacion për të rrëzuar dronët që hynë në hapësirën ajrore polake në muajin shtator. Kjo ishte hera e parë që një anëtar i NATO-s qëllonte dronët rusë që nga fillimi i pushtimit të Ukrainës në shkurt 2022. Moska mohon se qëndron prapa këtij incidenti. Avionët gjermanë Eurofighters po operojnë si pjesë e misionit Roja Lindore e NATO-s dhe do të mbeten të dislokuar në Malbork, rreth 60 kilometra larg nga Gdansku dhe 80 kilometra larg nga enklava ruse e Kaliningradit, deri në mars 2026. “Me këtë mision, ne po dërgojmë një tjetër mesazh të fuqishëm mbështetjeje për fqinjin tonë Poloninë dhe për NATO-n në tërësi”, tha shefi i Forcave Ajrore gjermane, Holger Neumann. Gjermania ka dërguar gjithashtu avionë luftarakë Eurofighter në Rumani si pjesë e përpjekjeve të NATO-s për të forcuar krahun lindor të aleancës, mes tensioneve në rritje me Rusinë.