24 orët e fundit janë regjistruar thuajse katër mijë infektime të reja në gjermani, por numri i viktimave, 528, sipas institutit Robert Koch, mbetet i lartë. Të dhënat tregojnë se shkalla e infektimit në gjermani mbetet 59 raste të reja për 100 mijë banorë, sipër vlerës objektiv prej 50 infektimesh për 100 mijë banorë ose asaj prej 35 infektimësh për 100 mijë banorë që është përcaktuar si kufi për të hequr izolimin. Si pasojë, në gjermani vazhdon të qëndrojë në fuqi regjimi i izolimit i nisur që më 16 dhjetor dhe i rinovuar, me pak modifikime, javën e kaluar, deri më 7 mars. Për të motivuar vendimin, angela Merkel përmend variantet e reja të koronavirusit, vecanërisht atë anglez dhe afrikano jugor. Sipas Merkel, në mungesë të masave të kufizimit, variantet mund të përhapen shpejt dhe të cojnë në një rritje të madhe të infektimeve. Ndaj edhe është vendosur të qëndrojnë të mbyllura dyqanet, baret, restorantet, kinematë, teatrot, qendrat estetike dhe shtëpitë publike. Është e detyrueshme mbajtja e maskave në mjetet e transportit publik, në dyqanet ushqimore dhe supermarkete. Nga 1 marsi ndërkohë mund të rihapen parukeritë. Ndërmarrjet duhet të mundësojnë sa më shumë punën nga shtëpia, udhëtimet jo të domosdoshme janë të ndaluara, dhe të vetmet lëvizje të lejuara janë ato për punë. Kancelarja donte një zgjidhje unike për shkollat, por nuk ka mundur ta arrijë këtë. Vetë landet kanë vendosur planin e rihapjes duke filluar nga 22 shkurti. Sidoqoftë, hapjet e reja do të jenë automatike, vetëm kur shkalla e infektimit të ketë zbritur në 35 raste të reja për 100 mijë banorë për një periudhë prej të paktën tre ditësh rresht. Pamjet: AFP