Zgjedhjet në dy landet më të zhvilluara të Gjermanisë, Bavari dhe Hese treguan rënien e lirë të partisë së kancelarit Olaf Scholz, që sipas ekspertëve konfirmon pakënaqësinë në rritje të gjermanëve mbi politikat e ndjekura prej kancelarit, sidomos për emigracionin dhe energjinë. Konservatorët e CDU fituan në Hesse me 34.6 për qind, me rritje 7.6 për qind në krahasim me zgjedhjet e 2018-s, ndërsa aleatët e tyre të CSU-së fituan në Bavari me 37 për qind të votave. Socialdemokratët e Olaf Scholz me kandidaten e tyre kryesore Nansi Faeser ministre e Brendshme në qeverinë federale, arritën rezultatin e tyre më të keq në histori me vetëm 15.1 për qind të votave në Hessen dhe 8.4 për qind të tyre në Bavari. Edhe dy partitë e tjera të koalicionit qeverisës federal, Të gjelbërit dhe Demokratët e Lirë nuk arritën rezultate më të mirë. Sipas të dhënave, ata janë shumë më poshtë se votat që siguruan 5 vite më parë në dy landet.