Skuadrat pakistaneze të shpëtimit gjetën mbetjet e një avioni mallrash në një operacion kërkimi në det të mërkurën, 12 orë pasi ai u zhduk në brigjet e Karaçit, ndërsa përpjekjet vazhdojnë për të gjetur pesë anëtarët e ekuipazhit që ishin në bord, thanë autoritetet. Mbetjet e Boeingut 737, u gjetën 98 km në jug të portit Ormara, tha Autoriteti i Aeroporteve të Pakistanit. Marina e Pakistanit dhe Agjencia e Sigurisë Detare të Pakistanit vendosën "mjete të ndryshme ajrore dhe detare" në përdorim për të gjetur avionin, tha autoriteti, duke shtuar se operacioni i kërkimit po vazhdonte për të gjetur anëtarët e ekuipazhit. Kryeministri Shehbaz Sharif kishte udhëzuar autoritetet të përshpejtonin kërkimin për avionin e mallrave që kishte 27 vite në përdorim që u zhduk në Detin Arabik pasi raportoi një problem me sistemin e navigimit. K2 Airëays, operatori i avionit, tha se ekuipazhi përbëhej nga dy pilotë, dy inxhinierë dhe një pjesëtar i stafit mbështetës. Autoritetet nuk kanë bërë asnjë deklaratë zyrtare mbi statusin e tyre, megjithëse Sharif shprehu "ngushëllimet e sinqerta" për familjet e tyre.