Hetuesit federalë të sigurisë në SHBA kanë gjetur "kutitë e zeza" të avionit të mallrave të UPS që u rrëzua gjatë ngritjes nga aeroporti në Louisville të Kentuckit, duke shpërthyer në flakë dhe duke vrarë të paktën 12 persona, thanë zyrtarët të mërkurën. Todd Inman, një anëtar i Bordit Kombëtar të Sigurisë së Transportit, konfirmoi gjithashtu se një "shtëllungë e madhe zjarri" kishte shpërthyer në krahun e majtë të avionit dhe se një nga tre motorët e tij u shkëput nga ai krah ndërsa avioni po lëvizte në pistë. Avioni 34-vjeçar i mallrave MD-11 ishte i destinuar për në Honolulu me tre anëtarë të ekuipazhit në bord kur u rrëzua menjëherë pasi kaloi një gardh në fund të pistës gjatë ngritjes të martën në mbrëmje, duke goditur një numër strukturash pak përtej pronës së aeroportit. Avioni u përfshi menjëherë nga flakët duke u shpërndarë edhe në një fushë mbeturinash që shtrihej rreth 800 m më tej dhe një impiant përpumimi të naftës që shpërtheu. Aksidenti dhe zjarret që pasuan detyruan aeroportin të mbyllej për gjithë natën dhe ndërprenë operacionet e UPS-së në aeroport