Sirenat e alarmit ajror u aktivizuan në Bahrejn dhe Kuvajt në orët e para të së hënës, pasi të dyja vendet thanë se reaguan ndaj sulmeve iraniane me raketa dhe dronë. Në një deklaratë të publikuar nga mediat shtetërore iraniane, Garda Revolucionare Islamike tha se ka goditur bazën ajrore Ali al-Salem në Kuvajt. Sipas saj, sulmi kishte në shënjestër pajisje ushtarake, mjete ajrore dhe një hangar ku ndodheshin dronë amerikanë. Garda pretendoi, gjithashtu, se ka shkatërruar një radar amerikan në Kuvajt me një sulm me dron. Ajo tha se ka sulmuar objektiva edhe në Jordani. Sipas saj, u goditën me raketa balistike avionë amerikanë të transportit ushtarak dhe objekte të komandës në aeroportin e Akabës, duke shkaktuar “dëme të mëdha”. Garda pretendoi se, të dielën vonë kishte sulmuar dy cisterna nafte në Ngushticën e Hormuzit, duke i nxjerrë jashtë funksionit.