Rreth gjashtë vjet më parë, kur kryetari i sapozgjedhur i Stambollit, Ekrem Imamoglu, i quajti zyrtarët e bordit zgjedhor "idiotë" për anulimin e fitores së tij të parë në votime, Presidenti Tajip Erdogan e identifikoi atë si një kërcënim serioz politik. Komenti coi në një dënim që u apelua, në një mori hetimesh ligjore dhe aktakuzash që kulmuan me burgimin e tij të dielën, në pritje të gjyqit, nën akuzat për korrupsion që janë cilësuar gjerësisht si të politizuara dhe antidemokratike. Kombinimi i suksesit zgjedhor dhe betejave ligjore e ka çimentuar tashmë statusin e Imamoglu si rivali kryesor i Erdoganit dhe kërcënimi më i madh për mbretërimin më shumë se 22-vjeçar të presidentit. Ai ka kultivuar një shpirt luftarak që u shfaq përpara se policia ta arrestonte herët të mërkurën, duke kritikuar atë që ai e quajti një "grusht shteti" kundër vullnetit të kombit. “Ne jemi përballur me tirani të madhe, por dua që ju ta dini se unë nuk do të dorëzohem”, tha ai në një video të regjistruar në telefonin e tij dhe të postuar në X, ndërsa qindra oficerë policie ishin mbledhur jashtë shtëpisë së tij. "Unë do të vazhdoj të luftoj kundër atij njeriu" tha 54-vjeçari, duke iu referuar Erdoganit. Qeveria mohon pretendimet e opozitës se Erdogan ka luajtur rol në lëvizjet ligjore dhe thotë se gjyqësori është i pavarur.