Policia e Tiranës ka arrestuar gjashtë persona në 24 orët e fundit, për vepra të ndryshme penale. Shërbimet e Komisariatit të Policisë Vorë, në bazë të informacioneve të siguruara nga qytetarët se një shtetas posedonte në banesën e tij dhe në automjetin me të cilin qarkullonte lëndë narkotike, kanë organizuar punën për kapjen e tij. Si rezultat është arrestuar në flagrancë shtetasi I. M., 34 vjeç, banues në Vorë. Gjatë kontrollit të ushtruar në automjetin dhe në banesën e këtij shtetasi, shërbimet e Policisë gjetën një sasi me lëndë narkotike kanabis, një sasi me lëndë narkotike resinë (nënprodukt i kanabisit), një peshore elektronike, një shumë parash dhe një aparat celular, të cilat u sekuestruan në cilësinë e provës materiale, së bashku me automjetin. Në pranga ra edhe një shtetas i shpallur në kërkim me inicialet A. S., 31 vjeç, pasi akuzohet për veprën penale “Goditja për shkak të detyrës”. Ndërsa 24 vjeçari K. M., u kap sepse Gjykata e Shkalles së Parë Tiranë e ka dënuar me 2 muaj burg, për “Plagosja e lehte me dashje” kryer në bashkëpunim. Raportohet gjithashtu se një 41 vjeçar, me inicialet F. H., u arrestua pas sherrit me administratorin e pallatit, të cilin e ka goditur me grusht. Specialistët e Qarkullimit Rrugor bënë arrestimin në flagrancë të dy shtetasve të cilët u kapën duke drejtuar mjetin në gjendje të dehur.