Policia e Lezhës ka gjetur edhe automjetin e dytë që dyshohet se është përdorur nga vrasësit e çiftit Kreshnik dhe Gentjana Mujeci, ngjarje e shënuar të dielën e 26 prillit në fshatin Balldre. Sipas hetimeve dhe kontrolleve të imtësishme në terren, Policia ka gjetur në fshatin Torovicë, në një rrugë dytësore, në tokë arë, pranë një kanali, automjetin tip “Audi A4”, i cili dyshohet se është përdorur nga bashkautorët, të cilët kanë pasur rolin e vëzhguesve të lëvizjeve të viktimave. Policia bën me dije se brenda automjetit janë gjetur dokumentacione që u përkisnin autorëve të shpallur në kërkim. Autoritetet bëjne me dije se automjeti u sekuestrua në cilësinë e provës materiale dhe do t’i nënshtrohet ekspertizave kriminalistike, ndërsa vijon kontrolli i zonave për kapjen e autorëve të shpallur në kërkim.