Qeveria italiane e Giorgia Melonit ka gati planin B në rast se Gjykata e Lartë italiane nuk i jep të drejtë në lidhje me transferimin e emigrantëve të paligjshëm në kampin e ngritur në Gjadër. Plani B është zbuluar nga media italiane, ‘Il Tempo’. Në një artikull të publikuar në edicionin online të saj, ‘Il Tempo’ shkruan se Giorgia Meloni po përpiqet që të shpëtojë investimin miliona eurosh në kampin e Gjadrit dhe një skenar është shndërrimi i këtij kampi në një burg për shqiptarët. Në artikull thuhet se nëse dështon ideja për të transferuar emigrantët e paligjshëm, kampi mund të presë të dënuarit shqiptarë në burgjet italiane për trafik droge, shfrytëzim prostitucioni, apo vrasje. Sipas të dhënave të autoriteteve italiane janë gati 3 mijë të dënuar shqiptarë për krime në kuadër të grupeve të strukturuara kriminale, që nga shpërndarja e drogës, te vrasjet.