Për fluturimin e helikoperëve Black Hawk u rikthye në funksion Baza Ajrore e Gjadrit, 50 vite nga krijimi i saj. Në ceremoninë e organizuar për këtë rast, komandanti i forcës ajrore, Ferdinand Dimo, u shpreh se tashmë që konceptet e sigurisë janë zhvilluar, rivitalizimi i bazës do të ofrojë infrastrukturë të re për trajnimet e ekuipazheve fluturuese të helikopterëve dhe për trajnimin bazik të pilotëve të rinj. Pesë dekada më parë, dy pilotë nga aeropori i Rinasit u ulën për herë të parë në pistën e aerodromit të Gjadrit me avionët supersonic MIG-19 dhe MIG-21. Pas 50 vitesh, baza ajrore e Gjadrit është operative për fluturimin e helikoperëve më të rinj të forcës ajrore, Black Hawk. Në ceremoni morën pjesë edhe personeli trajnues amerikan për helikopterët Black Hawk, duke reflektuar bashkëpunimin ndërkombëtar në zhvillimin e kapaciteteve ajrore të vendit. Dy helikopterët e parë UH-60 Black Hawk erdhën në Shqipëri në janar të këtij viti mbështetur me më shumë se 50 milionë dollarë nga fondet e ndihmës së Shteteve të Bashkuara të Amerikës. Helikopterët e rinj do të ndihmojnë në forcimin e aftësive të forcave ajrore të Shqipërisë dhe aftësinë për të kryer evakuim mjekësor, rikuperim të personelit, misione kërkim-shpëtimi, si dhe mbështetje të lëvizjeve logjistike të NATO-s për operacione dhe stërvitje.