Presidenti i Polonisë tha se fluksi i gazit nga Rusia në Evropën Perëndimore nuk duhet të rikthehet më kurrë, edhe nëse Rusia dhe Ukraina arrijnë një marrëveshje paqeje. Andrzej Duda i tha BBC-së se tubacionet e gazit Nord Stream, të cilat nuk janë përdorur që nga viti 2022, "duhet të çmontohen". Kjo, tha ai, do të bënte që Gjermania të mos tundohej të rikthente furnizimet ruse për të nxitur ekonominë e saj në vështirësi. "Mund të shpresoj vetëm se liderët evropianë do të marrin mësime nga agresioni rus kundër Ukrainës dhe se ata do të arrijnë një vendim për të mos rikthyer kurrë pompimin e gazit përmes këtij tubacioni," tha ai. Presidenti polak, duke folur në Forumin Ekonomik Botëror në Davos, këmbënguli se sanksionet ekonomike kundër Rusisë po funksionojnë dhe vendet evropiane duhet t'i rezistojnë presionit nga kompanitë për të rivendosur lidhjet e biznesit. Gazsjellësi Nord Stream u ndërtua nga gjiganti rus i gazit Gazprom dhe lidhnin Rusinë me Gjermaninë veriore. Nord Stream 1 u mbyll në vitin 2022 dhe Nord Stream 2 nuk u përdor kurrë, pas pushtimit të Ukrainës. Të dy u dëmtuan nga shpërthimet në vitin 2022. Çmimet e gazit në Evropë u rritën pas mbylljes dhe, muajt e fundit, politikanët nga partia e djathtë gjermane AfD kanë sugjeruar që tubacionet e gazit Nord Stream të rifillojnë funksionimin. Gjermania do të mbajë zgjedhjet federale në fund të shkurtit. "Unë besoj se tubacionet Nord Stream duhet të çmontohen," tha Duda. “Ky gazsjellës përbën një kërcënim shumë të madh për Ukrainën, Poloninë, Sllovakinë por edhe për vendet e tjera të Evropës Qendrore.