Gjykata Themelore në Prishtinë ka dënuar me 1 vit burgim me kusht ministrin në detyrë të Punëve të Brendshme, Xhelal Sveçla me akuzën për hedhje të gazit lotsjellës në Kuvend më 21 mars 2018. Ministri mungoi në momentin e shpalljes së vendimit. Gjykata Themelore në Prishtinë në seancën e 2 shtatorit 2026, e shpalli fajtor ministrin në detyrë për veprën penale “Përdorimi i armës apo mjetit të rrezikshëm”. Sipas aktakuzës së ndryshuar, Xhelal Sveçla më 21 mars 2018, nga ora 12:10 deri në orën 15:40, në sallën e seancave plenare të Kuvendit të Republikës së Kosovës, gjatë mbajtjes së një seance të jashtëzakonshme plenare, akuzohej se ka përdorur bombolën e gazit lotsjellës me përmbajtje të agjentit kimik CS. Sipas Prokurorisë, Sveçla në disa raste ka aktivizuar bombolën dhe e ka hedhur brenda sallës së Kuvendit, pa paralajmërim paraprak dhe pa u dhënë personave të pranishëm mundësinë për t’u larguar. Si pasojë, sipas aktakuzës, gazi irritues është përhapur në hapësirat e mbyllura të sallës, duke bërë që personat e pranishëm, nga frika për shëndetin dhe sigurinë e tyre, të detyroheshin ta largoheshin nga salla dhe seanca të ndërpritej.