Gazetarët kanë depozituar në Gjykatën Kushtetuese këtë të hënë kërkesën për pezullimin dhe shfuqizimin e rregullores së brendshme të Gjykatës së Posaçme me argumentin se cenojnë lirinë e medias dhe të drejtën e informimit. Padia prej 27 faqesh u depozitua nga Asociacioni i Gazetarëve shqiptarë, ku kërkohet pezullimi i dispozitave që prekin median dhe shfuqizimin e tyre si të papajtueshme me Kushtetutën. Rregullorja e hyrë në fuqi prej 1 shtatorit parashtron të paktën 7 kufizime për punën e përditshme të gazetarëve pranë kësaj gjykatë, ndërsa AGSH sqaron se nuk kundërshtohen masat që lidhen me sigurinë e gjykatës, por kufizimet që vendosen ndaj gazetarëve. Në një deklaratë nga gjykata Kushtetuese, Kreu i Asociacionit të Gazetarëve të Shqipërisë, Isa Myzyraj shprehu edhe zhgënjimin se pavarësisht kundërshtimit të gazetarëve, Gjykata e Posaçme nuk i ka ftuar për konsultim.