Policia turke ndërhyri me forcë në selinë e Partisë Republikane Popullore në Ankara, duke përdorur gaz lotsjellës dhe plumba gome ndaj mbështetësve dhe drejtuesve të opozitës që kishin qëndruar të ngujuar brenda godinës prej tre ditësh. Përplasja erdhi pas vendimit të gjykatës së Apelit që anuloi zgjedhjen e Özgür Özel si kryetar i CHP-së dhe urdhëroi rikthimin në krye të partisë të ish-liderit Kemal Kılıçdaroğlu. Pamjet nga mediat lokale treguan policinë speciale duke hyrë me forcë në ndërtesë mes reve të gazit lotsjellës, ndërsa mbështetësit e opozitës tentuan të rezistonin me fikëse zjarri. Mes personave që ndodheshin brenda selisë ishte edhe vetë Özgür Özel, i cili, pasi doli nga godina mes brohoritjeve të mbështetësve, deklaroi se do ta rimarrin ndërtesën dhe paralajmëroi vazhdimin e rezistencës politike. Pas largimit nga selia, ai dhe mbështetësit e tij nisën një marshim drejt Parlamentit turk. Tensionet janë rritur që prej së enjtes, kur gjykata pezulloi Özel dhe bordin drejtues të partisë. Vendimi është cilësuar nga opozita si i motivuar politikisht, ndërsa qeveria turke këmbëngul se gjykatat janë të pavarura. Shumë analistë e shohin presionin ligjor ndaj CHP-së si përpjekje për të dobësuar opozitën përpara zgjedhjeve të ardhshme, megjithëse autoritetet turke e mohojnë një gjë të tillë.