Jeff Bezos, themeluesi i gjigantit Amazon, do të zgjerojë veprimtarinë në fushën e Hapësirës. Ai do të lëshojë dy prototipe satelitësh në hapësirë për projektin e tij Kuiper. Bezos po planifikon të krijojë 3.200 pajisje në vitet në vijim për të mundësuar lidhjen në internet në çdo vend të botës. Bezos shpreson se do të sfidojë kështu sistemin Starlink të miliarderit Elon Musk, i cili tashmë ofron internet për shumë shtete. Dy satelitët e Bezosit do të ngjiten në orbitë me raketën Atlas-5. Ata do të nisen nga Florida pasditen e së premtes. Amazon e ka nisur procesin kërkimor dhe zhvillimor për projektin Kuiper që në 2018-ën, dhe deri më tani ka shpenzuar 10 miliardë dollarë. Kompania synon të rritet në tregun e ofrimit të internetit përmes shtrirjes së sistemit në Hapësirë, ndryshe nga lidhjet përmes fibrave optike në tokë. Kompania e Elon Musk është lidere në këtë drejtim dhe deri më tani ka 4.800 satelitë në orbitë.