Shtyhet për në fund të muajit shtator afati që kanë bizneset për të aplikuar për të përfituar nga garancia sovrane. Vendimi është bërë i ditur këtë të shtunë nga Ministrja e Financave Anila Denaj. Një ditë përpara se të përfundojë afati që kanë bizneset për të aplikuar për garancinë e dytë sovrane, nëpërmjet një statusi në rrjetet sociale ministrja Denaj ka sqaruar se një vendim i tillë është marrë për të lehtësuar dhe zbutur efektet që po lë pandemia tek çdo biznes. Afati fillestar ishte data 2 gusht 2020. “Shprehim mbështjetjen tonë ndaj biznesit duke aprovuar shtyrjen e Garancisë Sovrane 2 deri në fund të muajit Shtator. Vijojmë të ndërmarrim masat e duhura për lehtësimin dhe zbutjen e efekteve ekonomike për çdo biznes në këtë situatë. Kjo garanci sovrane aplikohet për bizneset në të gjithë sektorët e ekonomisë dhe për nevoja në kapital qarkullues dhe investime”, shkruan ministrja Anila Denaj.