Pas hapjes së garës nga Këshilli i Lartë i Prokurorisë, janë zyrtarizuar 5 kandidaturat për Prokuror të Përgjithshëm. I pari që dorëzoi kandidaturën ishte prokurori i SPAK, Andan Xholi. Prokurori i Posaçëm ka kandiduar më parë dy herë për drejtues të SPAK, ndërsa ka mbajtur postin e shefit të Seksionit Kundër Krimit të Organizuar në strukturën e posaçme. Me një karrierë mbi dy dekada në sistemin e drejtësisë, Xholi ka shërbyer si oficer i Policisë Gjyqësore dhe si prokuror në Gjirokastër, përpara se të transferohej në ish-Prokurorinë për Krime të Rënda në Tiranë. Gjatë karrierës së tij ka drejtuar përkohësisht Prokurorinë e Lezhës dhe Prokurorinë për Krime të Rënda. Në korrik të vitit 2021, pas kalimit të procesit të rivlerësimit kalimtar, Xholi iu bashkua SPAK, ku ka hetuar dosje të bujshme. Mes emrave si kandidatë për Prokuror të Përgjithshëm është rikthyer edhe Arta Marku. Ajo u zgjodh prokurore e Përgjithshme e Përkohshme në një seancë të tensionuar parlamentare në dhjetor 2017, kur deputetët e opozitës hodhën tymuese në shenjë proteste ndaj mënyrës së zgjedhjes së saj.