Vladimir Putin "do të vazhdojë ta çojë luftën përpara, gjithnjë e më thellë" nëse nuk ndalet, paralajmëroi Presidenti i Ukrainës Volodimir Zelensky. Duke folur në Asamblenë e Përgjithshme të OKB-së në Nju Jork, Zelensky tha se më shumë vende do të përballen me agresionin rus nëse aleatët nuk shfaqin një front të bashkuar dhe nuk rrisin mbështetjen. Ai tha se të gjitha kombet kërcënohen nga një garë globale armatimesh, ndërsa teknologjia ushtarake përparon, duke shtuar se "armët vendosin se kush mbijeton" dhe duke bërë thirrje për rregulla globale mbi inteligjencën artificiale. Komentet e tij vijnë pasi Presidenti i SHBA-së Donald Trump ndryshoi qëndrimin e tij mbi luftën Rusi-Ukrainë, duke thënë për herë të parë se Ukraina mund të rifitojë të gjithë tokën e saj. Zelensky kritikoi institucionet ndërkombëtare, duke sugjeruar se ato janë "shumë të dobëta" për t'i ofruar Ukrainës garanci sigurie, duke shtuar se të qenit pjesë e një aleance ushtarake siç është NATO "nuk do të thotë automatikisht se je i sigurt". "Tani po jetojmë garën më shkatërruese të armatimeve në historinë e njerëzimit", tha ai. Zelenski argumentoi se "ndalimi i Rusisë tani" është opsion më i mirë sesa "të pyesësh veten se kush do të jetë i pari që do të krijojë një dron të thjeshtë që mban një kokë bërthamore". Zelensky bëri thirrje për rregulla ndërkombëtare rreth inteligjencës artificiale dhe rolit të saj në armatim, dhe tha se zhvillimi i dronëve autonomë dhe avionëve pa pilot përfaqësonte një rrezik shumë më të madh sesa lufta tradicionale.