Debati rreth Arktikut po bëhet më i nxehtë se kurrë, ndërsa Presidenti i SHBA-së Donald Trump vazhdon të këmbëngulë që Groenlanda të bëhet pjesë e Shteteve të Bashkuara. Por, ndërsa kërkesat e Trump që SHBA të marrë nën kontroll një territor që i përket njërit prej aleatëve të saj më të afërt dhe më të besueshëm e kanë hutuar botën, gara për Arktikun vazhdon prej dekadash. Dhe për një kohë të gjatë, Rusia e ka fituar atë. Moska ka pasur një prani dominuese në rajonin e Arktikut. Ajo kontrollon afërsisht gjysmën e tokës dhe gjysmën e zonës ekonomike ekskluzive detare në veri të Rrethit Arktik. Dy të tretat e banorëve të rajonit të Arktikut jetojnë në Rusi. Dhe ndërsa Arktiku përbën vetëm një pjesë të vogël të ekonomisë globale, rreth 0.4% sipas Këshillit të Arktikut, forumit që përfaqëson shtetet e Arktikut, Rusia kontrollon dy të tretat e PBB-së së rajonit. Rusia ka zgjeruar gjurmën e saj ushtarake në Arktik për dekada, duke investuar në objekte të reja dhe ekzistuese në rajon. Sipas të dhënave, ka 66 baza ushtarake dhe qindra instalime dhe poste mbrojtëse brenda rajonit më të gjerë të Arktikut.