Një gjykatë në Kamboxhia ka akuzuar tre aktivistë të mbrojtjes së mjedisit, për komplot kundër qeverisë dhe fyerje të mbretit. Anëtarët e grupit Nëna Natyrë, u arrestuan pasi dokumentuan hedhjen e mbeturinave në lumin Tonle Sap të Phnom Penh-it. Ligji i Kamboxhias kundër fyerjes së mbretit është relativisht i ri dhe nuk është e qartë se c’kanë bërë konkretisht aktivistët. Të tre përballen me 5 deri në 10 vjet burg. Prokuroria tha se "provat e mbledhura nga policia ishin një fyerje për mbretin" megjithëse ata nuk shpjeguan saktësisht se si ishte shkelur ligji. Kritikët thonë se ligji, i prezantuar në 2018, po përdoret si një mjet për të censuruar kundërshtarët. Aktivistët u arrestuan më 16 qershor ndërsa dokumentonin shkarkimin e mbeturinave në lumin Tonle Sap pranë pallatit mbretëror, sipas Qendrës Kamboxhiane për të Drejtat e Njeriut. "Qeveria Kamboxhiane ka shënjestruar pa pushim grupin Nëna Natyrë," tha Naly Pilorge, drejtori i grupit të të drejtave Licadho. Themeluesi i ‘Nënës Natyrë’, Alejandro Gonzalez-Davidson, i cili u dëbua në 2015 pasi kritikoi planet për ndërtimin e një dige, u akuzua në mungesë. Muajin e kaluar, tre aktivistë të tjerë të lidhur me grupin u dënuan nga 18 deri 20 muaj burg për organizimin e një marshimi kundër mbushjes me rërë të një liqeni në kryeqytet.