Rrjetet sociale janë shëndërruar në një makineri gjigande promovimi. Tashmë edhe shumica e aktiviteteve elektorale zhvillohen live, duke qenë një mjet që u jep mundësi kandidatëve dhe partive për të mbërritur edhe tek persona që nuk kanë mundësi të jene prezent në takime. Për gazetarët e vjetër të politikës duket e largët dita kur rendnin për të arritur në kohë takimet elektorale në periudha fushatash, dhe në rastet kur nuk e arrinin këtë shkëmbenin materialet me njëri-tjetrin. Ndërsa për brezin e ri të reporterëve një gjë e tillë as që mund të mendohet në kohën e sotme të teknologjisë, kur fluksi i lajmeve dhe informacionit është kaq i madh sa ndonjëherë nuk ke kohë t’i shohësh të gjitha. Gjërat kanë ndryshuar me shpejtësi marramendëse në dekadën e fundit si në menaxhmin, ashtu edhe në organizimin e fushatave elektorale. Tashmë shumica e takimeve zhvillohen online dhe mund të ndiqen edhe kur ndodhesh në pjesën tjetër të globit në kohë reale, mjafton të vijë sinjalizimi në facebook. Rrallë mund të ketë tashmë gazetarë të terren që ndjekin aktivitetet e kandidatëve apo subjekteve, përveç stafeve të ngushta që bëjnë PR dhe që merren më pas me publikimet e tyre. Duhet thënë se takimet në terren janë të shumta si nga kandidatët ashtu dhe subjektet politike, edhe pse fushata këtë vit zhvillohet në kushtet e pandemisë që dikton kufizime të shumta.