Një arsenal armësh dhe municionesh u sekuestruan mbrëmjen e së mërkurës në një banesë në Kodër-Mëzez. Banesa ishte përshtatur si depo, ku në të modifikoheshin dhe prodhoheshin armë zjarri, silenciatorë dhe sende të tjera të kundërligjshme. Policia e Tiranës vuri në pranga dy shtetas Elvis Bakallin, 30-vjeç banues në Tiranë dhe Dorian Kalon 45-vjeç. Këta dy shetats akuzohen për kryerjen e veprës penale ‘Mbajtja pa leje dhe prodhimi i armëve, armëve shpërthyese dhe municioneve”, kryer në bashkëpunim. Top Channel siguroi pamje ekskluzive nga brenda banesës, e cila ndodhet në rrugën “Shaqir Shima”, në Kodër Mëzez, në brendësi të së cilës u konstatuan makineri si: torno, freza dhe vegla të tjera pune që shërbenin për prodhimin dhe modifikimin e pjesëve të armëve të zjarrit, si dhe për prodhimin e silenciatorëve të armëve.