Dy turistë ukrainas janë shpëtuar nga Policia Kufitare pasi rrezikuan të mbyteshin në det në zonën e Ksamilit, si pasojë e përkeqësimit të motit. Sipas njoftimit zyrtar, shërbimet e Njësisë Speciale Delta konstatuan gjatë patrullimit një mjet lundrues tip skaf që po fundosej për shkak të erërave të forta dhe kushteve të rënduara atmosferike. Në bord ndodheshin dy shtetas ukrainas, të cilët kishin marrë skafin me qira. Efektivët ndërhynë menjëherë dhe bënë të mundur nxjerrjen e tyre në siguri, duke shmangur një ngjarje me pasoja të rënda.