Autoritetet egjiptiane thonë se 28 persona janë shpëtuar dhe 17 të tjerë janë ende të zhdukur pasi një anije turistike u mbyt në Detin e Kuq. Një sinjal ndihme u mor në orën 05:30 minuta sipas orës lokale nga anija Sea Story, që u largua nga porti afër Marsa Alam-it të shtunën për një udhëtim pesë-ditor zhytjeje me 31 turistë në bord dhe 14 pjesëtarë të ekuipazhit. Zyrtarët thanë se të mbijetuarit u gjetën në zonën Vadi el-Gemal, e cila është në jug të Marsa Alamit, dhe se ata po merrnin kujdesin e nevojshëm mjekësor. Ata shtuan se luftanija e marinës egjiptiane El Fateh dhe avionët ushtarakë po intensifikonin përpjekjet e tyre për të gjetur të zhdukurit. Marsa Alam është një destinacion popullor për turistët në bregun jugor të Detit të Kuq të Egjiptit dhe është i rrethuar nga pika zhytjeje, duke përfshirë shkëmbinj nënujorë të njohur koralorë. Sipas të dhënave, anija e fundosur është ndërtuar në vitin 2022 dhe është e gjatë 44 m. Ajo ka katër kuverta dhe 18 kabina ku mund të qëndrojnë deri në 36 pasagjerë.