Në Xhonston, të Ioëas, në SHBA, është mbajtur ceremonia e organizuar me rastin e dërgimit të përbashkët të trupave nga Forca e Sigurisë Kosovës dhe Garda Kombëtare e Ajovas në mision paqeruajtës. Në fjalim përmes lidhjes video, komandanti i Forcave të Sigurisë së Kosovës, Rrahman Rama, tha se ky është një moment historik për vendin. "Faleminderit popullit të Ajovas si dhe udhëheqësve si në nivel shtetëror ashtu edhe në atë federal për besimin ndaj të arriturave të FSK-së dhe popullit të Kosovës", ka thënë Rama. Kim Reynolds guvernatore e Ajovas, vlerësoi përkushtimin e këtyre forcave për lirinë, duke i falenderuar për sakrificën dhe shërbimin.Më 6 janar, Komandanti i FSK-së, tha se për dërgimin e misionit paqëruajtës në shqyrtim janë dy vende: Kuvajti dhe Iraku, por destinacioni nuk është konfirmuar ende. Radio Evropa e lirë shkruan se opsioni i irakut është më pak i mundshëm, pasi ky vend nuk e ka njohur ende kosovën. Edhe pse simbolike, pjesëmarrja e FSK-së në misionet ndërkombëtare, konsiderohet shumë e rëndësishme për kosovën. Dërgimi i kontigjentit të FSK në mision jashtë vendit u miratua në kuvend më 5 janar. Një ditë më pas, ushtruesja e detyrës së presidentit, Vjosa Osmani, nënshkroi autorizimin për nisjen e tij në mision paqeruajtës. FSK-ja, deri më tani, nuk ka marrë pjesë në operacione paqeruajtëse jashtë vendit. Kosova ka partneritet shtetëror me Ajovan, Garda Kombëtare e së cilit ndihmon FSK-në në ngritjen e saj dhe konsolidimin në ushtri.