Misioni paqeruajtës i NATO-s, KFOR ka reaguar pas incidentit të Pjesëtarëve të Forcës së Sigurisë së Kosovës (FSK) në veri të vendit, të cilët hynë gabimisht në Mitrovicë të Veriut për disa minuta. “KFOR-i mirëpret respektimin e vazhdueshëm nga FSK-ja të marrëveshjes për të mos dislokuar personel në veri të Kosovës, pa njoftim paraprak dhe pa miratimin e komandantit të KFOR-it’ ka reaguar misioni paqeruajtës I NATO-s në Kosovë. Forca e Sigurisë së Kosovës tha se pjesëtarë të saj me disa automjete u futën gabimisht në veri të vendit, pasi e kishin ngatërruar drejtimin e lëvizjes. Sipas kësaj force, incidenti ndodhi rreth orës 10:30 të së enjtes, gjatë lëvizjes së autokolonës nga Istogu për në kazermën e FSK-së në Mitrovicë. Kjo ngjarje nxiti reagimin e zyrtarëve serbë, të cilët e cilësuan si shkelje të marrëveshjes për dislokimin e FSK-së në veri, teksa Lista Serbe tha se kjo ngjarje ka rritur tensionet. Dislokimi i FSK-së në veri të vendit është i mundur vetëm me pëlqimin paraprak të KFOR, bazuar në zotimin e vitit 2013 nga Qeveria e Kosovës ndaj NATO-s.