Kompanitë ajrore në SHBA kanë afat deri më 30 qershor që të përshtasin sensorët e avionëve të tyre për të shmangur avaritë pas aplikimit të teknologjisë 5G. Autoritetet amerikane kanë refuzuar kërkesën për shtyrjen e këtij afati, mes shqetësimeve se teknologjia e re e komunikimit mund të shkaktojë probleme në sistemet aktuale të avionëve. Sekretari i Transportit Pit Batigieg tha të martën se linjave ajrore u ishte thënë se afati i 1 korrikut për shtrirjen e rrjetit 5G do të mbetet në fuqi. Linjat ajrore kanë paralajmëruar se nuk do të jenë në gjendje të përmbushin afatin dhe mund të detyrohen të anulojnë me qindra fluturime. Kompanitë e telekomunikacionit kanë shtyrë shtrirjen e teknologjisë 5G për t’u dhënë kohë linjave ajrore që të përshtasin sensorët e avionëve të tyre pas frikës se kjo teknologji mund të ndërhyjë në sistemet e fluturimit.