Një zyrtar i lartë iranian ka paralajmëruar se Teherani mund të ndryshojë doktrinën e tij bërthamore dhe të nisë ndërtimin e bombave bërthamore, nëse kërcënohet ekzistenca e shtetit. Kamal Kharrazi, kreu i Këshillit Strategjik Iranian deklaroi në një intervistë se Irani “ka kapacitet për të prodhuar bomba” edhe pse shteti nuk ka ndërmarrë hapa konkretë për ndërtimin e bombave. Deklaratat e tij u bënë ndërkohë që janë përshkallëzuar tensionet mes Iranit dhe Izraelit, në një kohë që komuniteti ndërkombëtar ka shprehur shqetësim lidhur me ambiciet bërthamore të Iranit. Republika Islamike vazhdimisht ka pretenduar se programi i saj bërthamor ka qëllime civile. Teherani ka shkelur kushtet e marrëveshjes bërthamore prej 2018-tës duke prodhuar uranium me nivel të lartë. Paralajmërimi për ndryshimin e doktrinës bërthamore pason incidentin e muajit të kaluar, kur Izraeli thuhet se shënjestroi një sistem radarësh në një bazë afër qytetit iranian, Isfahan.