Nisja e zbatimit të paqes fiskale ka nxitur drejtorinë e përgjithshme të tatimeve që të dalin me një deklaratë paralajmëruese ndaj subjekteve fizike dhe juridike që mund të përfitojnë nga amnistia për të shmangur detyrimet. Tatimet kanë publikuar një njoftim ku ndër të tjera paralajmërojnë kontrolle për të parandaluar çdo tentativë abuzimi apo përdorimi të kësaj nisme për pastrim parash. Më herët edhe Agjencia e Inteligjencës financiare ndau të njëjtin shqetësim në një shkresë dërguar grupeve të interesit. Agjencia ka informuar të gjitha subjektet, se ligji “Për marrëveshjen e paqes fiskale”, nuk ofron asnjë lloj imuniteti administrative, ose penal ndaj veprimeve të tatimpaguesve për pastrimin e parave, financimin e terrorizmit apo për çdo vepër tjetër penale, që lidhet me origjinën e jashtëligjshme të fondeve apo pasurisë dhe për rrjedhojë nuk cenon zbatimin e asnjë prej detyrimeve të ligjit për parandalimin e pastrimit të parave. Ndërkohë, tatimet thonë se Paqja Fiskale përfaqëson një hap të rëndësishëm drejt formalizimit të ekonomisë, rritjes së transparencës financiare dhe forcimit të besimit tek sistemi fiskal.