Greqia do të bashkëpunojë me Izraelin për sistemet anti-dronë dhe sigurinë kibernetike, tha të martën ministri grek i Mbrojtjes, Nikos Dendias, pasi u takua me homologun e tij izraelit në Athinë. "Ne ramë dakord të shkëmbejmë pikëpamje dhe njohuri për të qenë në gjendje të përballemi me dronë apo në veçanti me tufa mjetesh pa pilot dhe grupe mjetesh nënujore pa pilot," tha Dendias në deklarata të përbashkëta me ministrin izraelit të Mbrojtjes, Israel Katz. "Ne gjithashtu do të punojmë së bashku në mënyrë që të jemi të gatshëm të ndalim kërcënimet kibernetike". Me lidhje të forta ekonomike dhe diplomatike, Greqia dhe Izraeli operojnë një qendër trajnimi ajror në territorin grek dhe kanë zhvilluar stërvitje të përbashkëta ushtarake vitet e fundit. Greqia vitin e kaluar miratoi blerjen e 36 sistemeve të artilerisë raketore PULS të prodhuara në Izrael për rreth 650 milionë euro. Ajo gjithashtu ka qenë në bisedime me Izraelin për të zhvilluar një sistem shumështresor të mbrojtjes ajrore i cili vlerësohet të kushtojë rreth 3 miliardë euro. "Ne jemi po aq të vendosur për sa i përket një çështjeje tjetër kritike: të mos lejojmë aktorët që kërkojnë të minojnë stabilitetin rajonal të fitojnë terren përmes terrorit, agresionit ose ndërmjetësve ushtarakë në Siri, në Gaza, në Detin Egje", tha Katz. Dendias dhe Katz nuk thanë se kush do të përbënte kërcënim me dronë, sulme kibernetike apo lloje të tjera për vendet e tyre. Por Greqia dhe Izraeli e shohin Turqinë si një shqetësim të rëndësishëm për sigurinë rajonale.