Edhe për një ishull vullkanik të mësuar me dridhje toke të herë pas hershme, kjo ka qenë një javë aspak e zakontë në Islandë. Sipas zyrës meteorologjike të vendit, rreth 17 mijë tërmete kanë prekur rajonin jugperëndimor të Reikjanes, gjatë javës së shkuar. Tërmeti më i madh ka qenë i manjitudës 5.6 i shkallës Rihter, dhe u regjistrua mëngjesin e 24 shkurtit. Ai ishte më i madhi në një varg tërmetesh që vazhdojnë të shkundin zonën në afërsi të kryeqytetit të vendit Rikjavik dhe rreth tij, ku dy të tretat e popullatës së islandës jetojnë. Dy tërmete të mëdha, me manjitudë 5 u regjistruan po ashtu më 27 shkurt dhe më 1 mars. Tërmetet kanë shkaktuar pak dëme deri më tani, edhe pse zyrtarët islandezë kanë raportuar carje të vogla në rrugë dhe rënie gurësh në zonat e afërta me epiqendrën. Islanda ndodhet në fakt mbi kufirin e një pllake tektonike që vazhdon të luhatet, duke shtyrë amerikën e veriut dhe euro-azinë larg njëra tjetrës. Pjesa më e madhe e aktivitetit sizmik atje regjistrohet vetëm përmes pajisjeve të specializuara. Dridhje të herëpashershme të tokës, më të forta, janë pjesë përbërëse e jetës në një rajon sizmik aktiv. Por këtë radhë, duket sikur dridhjet e tokës nuk po kanë fund dhe po shkaktojnë shqetësim. Me disa vullkanë në zonë, zyrtarët lokalë kanë paralajmëruar se një shpërthim mund të jetë i afërt.