Shërbimet sekrete gjermane dhanë alarmin për rrezikun në rritje për ndërhyrje të Moskës në Gjermani dhe Europë. Tre krerët e shërbimeve të inteligjencës gjermane njoftuan se kanë kërcënime nga shumë drejtime, duke iu referuar kërcënimeve nga jashtë, nga Rusia, Kina, Irani, si edhe kërcënimeve të brendshme nga radikalizmi islamik dhe e djathta eksteeme. Zyrtarët e inteligjencës nënvizuan veçanërisht ndërhyrjen e Moskës në Gjermani në kontekstin e luftës në Ukrainë. “Spiunazhi dhe sabotazhi rus po shtohen në Gjermani, si në sasi edhe në cilësi”, tha kreu i agjencisë gjermane të zbulimit Bruno Kahl. Gjermania është tronditur nga disa raste të spiunazhit pas të cilave dyshohet se qëndron Rusia. Shërbimet sekrete gjermane akuzuan Moskën se qëndron pas ngjarjes së shënuar në korrik, kur një pako mori flakë në një qendër të DHL-së, përpara transportit të planifikuar me avion.