Fregata gjermane "Hessen", e vendosur në Detin e Kuq për të mbrojtur anijet tregtare, zmbrapsi sulmin e parë nga Huthit, milicia që vepron nga Jemeni. Sipas Bundesëehrit, një anije që merrte pjesë në misionin ushtarak të BE-së "Aspides" shkatërroi dy dronë. Ishte ky përdorimi i parë i municioneve nga marina gjermane në një operacion që filloi të premten dhe konsiderohet si misioni detar më i rrezikshëm në historinë e Bundesëehrit. Duke bombarduar anijet tregtare në Detin e Kuq, milicia Huthi, aleate me Iranin, dëshiron t'i japë fund sulmeve izraelite në Rripin e Gazës. Operacioni ushtarak izraelit është një përgjigje ndaj sulmit terrorist të Hamasit islamik më 7 tetor. Rruga detare përmes Detit të Kuq dhe Kanalit të Suezit është një nga rrugët më të rëndësishme tregtare në botë. Për shkak të sulmeve nga Huthi, të armatosur nga Irani, kompanitë e mëdha të transportit detar po shmangin gjithnjë e më shumë lidhjen më të shkurtër detare midis Azisë dhe Evropës – me pasoja të rëndësishme për ekonominë globale. Të premten, Bundestagu miratoi pjesëmarrjen gjermane në misionin e BE-së "Aspides”. Fregata "Hessen" u nis më herët për në zonën operative me qëllim që të fillojë të përmbushë detyrat e saj. Ky mision kontribuon edhe në stabilizimin e rajonit, tha ministri i Mbrojtjes Boris Pistorius. "Por duhet të jemi të qartë: misioni i "Hessen” është një nga më të rrezikshmit për marinën gjermane në dekadat e fundit”, paralajmëroi ministri. Javën e kaluar, milicia Huthi bëri të ditur se do të zgjerojë sulmet ndaj anijeve tregtare në brigjet e Jemenit. Udhëheqësi Abdel-Malik al-Houthi tha në një fjalim televiziv se përshkallëzimi ishte një përgjigje ndaj përshkallëzimit të Izraelit në Rripin e Gazës. Deri tani janë sulmuar 48 anije. Ai gjithashtu njoftoi përdorimin e armëve nënujore. Disa vende perëndimore, përfshirë SHBA-në dhe Britaninë e Madhe, janë përfshirë në operacionet për të zmbrapsur sulmin.