Deklarata e presidentit ukrainas, Volodymyr Zelensky, se Ukraina nuk e ndryshon qëndrimin për mosnjohjen e pavarësisë së Kosovës, ka shkaktuar reagime të shumta në Kosovë dhe Shqipëri. Gjatë vizitës së tij në Serbi dhe konferencës së përbashkët për media me presidentin serb Aleksandar Vuçiç, Zelensky tha se qëndrimi i Kievit për Kosovën mbetet i pandryshuar. “Ne respektojmë integritetin territorial të partnerëve tanë dhe të drejtën ndërkombëtare. Sa i përket Kosovës, qëndrimi ynë mbetet i pandryshuar. Jemi mirënjohës ndaj Serbisë për respektimin e integritetit territorial të Ukrainës, përfshirë Krimenë”, deklaroi ai. Në shenjë reagimi ndaj deklaratës së Zelenskyt, gjatë së dielës është hequr nga Prishtina mbishkrimi “Free Ukraine”, i vendosur më herët si simbol solidariteti me Ukrainën. Deklarata ka nxitur kritika, veçanërisht për faktin se Kosova ka qenë një prej vendeve që ka shprehur mbështetje të fortë për Ukrainën pas nisjes së pushtimit rus në shkurt të vitit 2022. Prishtina i është bashkuar sanksioneve kundër Rusisë dhe ka ofruar mbështetje për qytetarët dhe gazetarët ukrainas të larguar nga vendi për shkak të luftës.