Franca është gati të rrisë ushtrinë e saj, në përgatitje për një pushtim të mundshëm rus, me vullnetarët që përballen me një dislokim 10-mujor me një paketë page prej 10 mijë eurosh. Ish-superfuqia koloniale i bashkohet kështu listës në rritje të vendeve evropiane që po ndërmarrin hapa për të forcuar ushtritë e tyre në përgjigje të kërcënimit rus. Presidenti Emmanuel Macron pritet të njoftojë të enjten një plan për të forcuar ushtrinë e Francës, në një rishikim të skemës së saj aktuale katër-javore të shërbimit kombëtar. Në një përpjekje për t'iu kundërvënë kërcënimit rus, vullnetarët do të paguhen deri në 10,000 euro për t'u bashkuar me programin 10-mujor. Shpresa është që numri i rezervistëve të rritet deri në 50,000 çdo vit dhe të adresohet kështu "konfrontimi hibrid" i Moskës. Rekrutimi i detyrueshëm ushtarak në Francë u hoq në vitin 1996. Kjo nuk do të thotë që francezët do të dërgohen për të luftuar në Ukrainë, siguroi Macron vendin. "Ne duhet të shuajmë çdo keqkuptim", tha ai. Në mars, Macron tha se Franca dhe Evropa duhet të jenë gati nëse SHBA nuk do të jetë më në krah të tyre. "Ne duhet të jemi të bashkuar dhe të vendosur për të mbrojtur veten," tha Macron në atë kohë. Ai mbajti një fjalim të fortë ku paralajmëroi për një "epokë të re", në mesin e trazirave të vazhdueshme të politikës globale. Ai njoftoi se Franca mund të përgatisë armët e saj bërthamore për të mbrojtur kontinentin nën një ombrellë mbrojtëse kundër agresionit rus. Dhe kjo vjen ndërsa shefi i shtabit të ushtrisë franceze, gjenerali Fabien Mandon, akuzoi vendin se i mungon "forca e shpirtit" për një luftë me Moskën. “Ne kemi njohuritë e forcën ekonomike dhe demografike për të dekurajuar regjimin në Moskë”, tha ai javën e kaluar. “Ajo që na mungon… është shpirti”, tha ai. I kritikuar nga disa si luftënxitës, Mandon tha se Rusia po "përgatitej për një përballje me vendet e natos deri në vitin 2030".