Franca kreu të mërkurën testimin e saj të parë të një rakete të përditësuar me aftësi bërthamore, të projektuar për t'u lëshuar nga një avion luftarak Rafale, tha ministri i Mbrojtjes Sebastien Lecornu. Raketa ASMPA-R u lëshua pa një kokë bërthamore nga një avion ushtarak në një testim të kryer "mbi territorin kombëtar... në një simulim të një sulmi ajror bërthamor", tha Lecornu në një deklaratë. Në një postim të veçantë në platformën X, ai përgëzoi "të gjitha forcat, ekipet e ministrisë të mbrojtjes dhe partnerët e përfshirë" në një operacion "të planifikuar prej kohësh".Testi i raketës bërthamore franceze erdhi një ditë pasi Rusia filloi stërvitjet bërthamore në Distriktin e saj Ushtarak Jugor, i cili kufizohet me Ukrainën dhe përfshin pjesë të vendit që Moska pretendon se ka aneksuar. Deklarata e Lecornu nënvizonte se stërvitja franceze kishte për qëllim të mbështeste "besueshmërinë e fuqisë parandaluese bërthamore në ajër" së bashku me armët franceze të lëshuara nga nëndetëset. Franca planifikon të shpenzojë rreth 13 për qind të buxhetit të saj ushtarak gjatë viteve të ardhshme për aftësinë e saj bërthamore, duke përfshirë përmirësimin e raketave të gjeneratës së ardhshme që lëshohen nga ajri deri në vitin 2035.