Franca mund të shkojë drejt zgjedhjeve të tjera të parakohshme parlamentare, tha një ministër qeveritar të martën, pasi partitë e opozitës thanë se do të votonin për të rrëzuar kryeministrin Francois Bayrou (Barjro) dhe tregjet franceze u lëkundën. Bayrou tronditi politikën që ishte ende në gjumin e verës të hënën, me lëvizjen e tij të papritur për të kërkuar një votëbesim më 8 shtator për planin e tij të uljes së borxhit. Partitë kryesore të opozitës në vend nxituan të bënin të qartë se do të votonin kundër tij dhe qeverisë së tij të pakicës. "Ne kemi nevojë për një Kryeministër të ndryshëm dhe, mbi të gjitha, një politikë të ndryshme," shkroi ligjvënësi socialist Boris Vallaud në X. Vota e besimit do të mbahet dy ditë para protestave të thirrura nga grupe të ndryshme në mediat sociale dhe të mbështetura nga partitë e majta dhe disa sindikata, që po krahasohen me protestat e Jelekëve të verdhë që shpërthyen në vitin 2018, kundër rritjes së çmimeve të karburantit dhe kostos së jetesës. Ato protesta u shndërruan në një lëvizje më të gjerë kundër Macron dhe përpjekjeve të tij për reformë ekonomike.